forza inter

وخروووووا عني ابي اتشمت ، خروا عني ابي اضحك كااااااااك
ايي صح احنا اب اول الدوري والدرب طويل بس لا تلعب مع عمك انت وياه ، طعم الفوز حلو وخصوصا اذا تشمت بالخسران لأنه كان يظن انه عنتر زمانه وان الاي سي ميلان بطل الابطال الي ماشم ريحه الكاس من 4 سنين
كلامي اليوم موجهه حق اتباعي الأعزاء بتويتر لأن صارت مناوشات ومهاترات على فوز الانتر على اي سي ميلان ، وثاني شي حق ربع البي بي ام الاي سي ميلانيين واقولكم هاااااردلك بدون شماته لأن اخلاقكم رياضيه وعلى راسي بو سعيد والله انك وحش ياخوك ، واخيرا البطل المغوار الهمام صاحب القيل والقال والكلام بلا افعال الفعتوووه الكبير

Ducati

كااااااك اشرب انت وياه من كاس المر ، لحد يقولي احنا وانتوا وصار وقلنا والكاس والدوري ، هذا احتفال محلي بمناسبه مباراه امس انا ماقلت خذينا الدوري بعد بس هذي صفعه على جبين اللي نايمين على ودانهم وسابحين بالعسل وان شالله بناخذه هالسنه بعد !!

الحين عقب ماطلعت شوي من الي فيني راح اقولكم السالفه : الاخ الفعتوه الكبير ديكاتي من عشاق اي سي ميلان وانا انتر ميلاني لحد النخاع ، صار حجي مني ومناك على الديربي الي كان امس بين افرقتنا المهم قلنا الخسران يدفع حساب الطاوله ولأن خسارته اكيده قال ديكاتي لا خلها علي بس ابت النفس العزيزه الكريمه هذي الرشوه وقلت له : لما تنطقون انا اتلذذ بحساب القهوه لا تقول ادفع من الحين قبل لا تشوف فريقك يخسر XD

منو يقول طاولتنا ما كانت موقع استراتيجي على 4 تلفزيونات ؟؟



و نزلت النتيجه كالصاعقه على خشمه

0 - 4

وانا كلش ماكنت اقحص مكاني من الضحك والشماته ، الريدبوول صج عطاني جوانح وطرت فيهم بالكلام P:
واحد من الشباب كان موجود وشال عنا الحساب طبعا ماخلاني ادفع ديكاتي بس معلش عوضتها بالسحور لما رحنا شيليز


ادددددددفع يا ديكاتي والقلب داعي لك هااهااااي والله الاكل احلى واطعم لما يكون مو من جيبك وممزوج بطعم الفوز والشماته XD
طبعا البوست هذا ماكان داش مع الرهان بس شسوي انا احب اطفر بو دكته حبييب الألب P:
لايزعل معوضين ان شالله XD

--------------------------------

انا عادتي جنطه اللابتوب وعدتي معاي وين ما اروح ، امس لما كنا بالكافيه قبل المباراه شغلت اللابتوب وماقصر بو دكته عطاني يوزره مال زاجل وشبكت اجيك واحوس مني ومناك ، قلت دام انا قاعد اشوف المباراه ليش مااشغل الداون لوود واعوض الشغلات الي انمسحت من هاردسكي : يوم شغلت الداونلود ياجماعه الخير ولا ماشالله اللهم زيد وبارك مشلع ، اخلي الصوره تتكلم عن الداونلود ريت D:

منو يقول اني نزلت 5 قيقا اب اقل من 3 ساعات XD
لا يقولك زاجل مسويه عرض طول شهر رمضان روح اشبك ابلاش بس دز مسج عادي يعطونك يوزر وباسوورد وحييييل فيهم السرعه 8 ميقا محد قدك D:

--------------------------------

عندي بعد جم موضوع بس احس كافي البوست طال وانا حدي فيني طاقه خل احطها اب شي ثاني اليوم D:

at Sunday, August 30, 2009

i wanna kill someone

آآآآآآه وخروا عني يا جماعه مقهووور فيني حجي وايد ابي ابط الجربه وبخربها

اليوم واخيرا رحت تفطرت عند يدتي ، اليومين الي طافوا كله بالبيت شكلها عين ولا شي لوووول المهم يدتي دقت قعدتني من النوم وبدلت ورحت ، مادري منو صبحت بويهه الي جابلني ريل يدتي - حسبت يدي بس فعليا ريل يدتي - ، شنو القصه بالضبط انا اقولكم :
امس دقت علي اختي السياره مختربه فيها وكان عندها معرض باليرموك ، رحت وعطيتها سيارتي وخذيت السياره الخربانه وطرت على الصناعيه القراج قالي راح اسكر الحين ييبها باجر ولا تمشي عليها ، وبما ان بيتنا شوي بعيد صفطت السياره عند بيت يدتي علشان عقب مااتفطر عندها اودي السياره

اليوم لما وصلت واشوف سياره اختي قلت هذي متى طلعت من البيت لوووول جان استوعب بعدين انا صافطها من امس P:

الحبيب اول ماشافني صعدت قالي شفيها السياره قلت له الخراب الي فيها جان يقولي انت شفهمك وانت غشيم ونام فيني نووم - كالعاده انا عمري مااطلع فاهم عنده إلا اذا يبي شي مني غير جذي انا والكرسي واحد - قالي عطني المفتاح ونزل يشوف السياره ، انا قاعد مع يدتي وعمتي اذن جان نتفطر ولا الحبيب صاعد مع الله اكبر ونازل شخط فيني لوووول انا مالي شغل وانت شفيك ماتفتهم السياره مافيها زيت اشلون تمشي عليها راح تطق المكينه ابوك اشلون حاط بيدك سياره وماخلى كلمه تفتح النفس على الفطور إلا قالها ، طبعا اهو ريال عود قريب الستين وين اقدر ارادد ولا اتلاشط معاه بالكلام وعلى فكره انا امس بنفسي مجيك على الزيت ورحت القراج خليته يجيك بعد وماكان فيه شي ، اشلون بقدره قادر ينقص بظرف يوم :/
شوي جان يرد ينزل حق السياره ويصعد اييب لي القيج مال الزيت ويحطه على صحني يقولي شوف الزيت وين واصل انتوا شفيكم هذي اختك لا تخلي سيارتها جذي ومن هالحجي ، المشكله آخر سيرفس كان بالوكاله يعني انا شكووووو !!

على بالكم خلاني اتفطر واتهني بالاكل ، طول مااهو قاعد وداش باخلاقي روح اشتر زيت وشيل وحط وانت ماتفهم خلك على الكمبيوترات والوايرات ومايندرى تفهم فيهم ولا قاص علينا ، استغفر الله عوفني صيامي لما راح الدوام وعمتي ويدتي تكركر ماله والي يطالعوني ويضحكون محد فكني منه D:


عن الحوسه وعوار الراس بعد التروايح رحت وشريت قواطي زيت وعبيت السياره مع اني مو مقتنع ، رحت الصناعيه مره ثانيه جان يزفوني لوووول يقولون الزيت وايد منو ال*** الي قص عليك كااااك برد جبدي شوي P:
اليد كان يقولي السياره مافيها إلا العافيه بس سو لها تصفيه وسيرفس دهن وفلتر وموضوعك خالص ، القراج قالي عندك بستن واقف ويبيله فجه مكينه ولازم تخلي السياره لي باجر ، خليتها بالقراج وجنه العيد انا اصدق اهل الخبر P:

حاليا انا مقهور ولايعه جبدي لأن هالسالفه قاعده تصير كل فتره وماني داري شنو الحل ، إلا ان ألقى حل قلت خل افضفض اهني

ان شالله ماغثيتكم وايد P:

at Monday, August 24, 2009

مبارك عليكم الشهر

كل عام وانتوا بخير ومبارك عليكم الشهر ، ادري شوي متأخر بس انا خليتها لما يدش رمضان صج وتحسون فيها عدل P:
امس اول ماقعدت من النوم ومثل ماانتوا شايفين خياس نوم لما المغرب لوووول المهم اجيك على المسجات ولا الوطنيه طويله العمر دازه مسج والظاهر عيديتي امبجر ، يقولون انت مخلص للشركه من اكثر من 6 سنين مايدرون عندي خط من كل شركه لوووول ومعطيني ساعه فري و 600 مسج ، منو يقول ماطاروا مسجات ومكالمات انهنئ الرعيه بقدوم الشهر الكريم XD

اليوم طقيت فره على كذا مكان ولازم اختمها عند يدتي خو تدرين اجيك على الحلال ونشوف شنو الفطور ، دشيت مالقيتها قعدت شوي مع عيال عمتي رادين من قبرص صابغين تقول عيال الخدامه مو عيالنا خخخخ لعبت معاهم شوي ونزلت احوس بالمطبخ ولا هذي سانتي خدامتنا : ها طويله العمر شنو فطورنا باجر ؟ ضحكت علي تقول مادري خل اتيي ماما ونشوف شنو راح نطبخ ، انت اذا مشتهي شي قولي من الحين خل ازهبه لك ، فديت راسج وتسلم ايدج لوووووول XD

على بالكم دش رمضان يعني يتغير السستم ، اذا كنت نايم اقعد قبل الفطور بربع ساعه اغسل واتوضى واطير بيت يدتي . ابوي يقولي مايمديك تفطرنا عندنا لا تشاخط ماراح تموت يوع لووول اقوله من عن الاكل بس الجو هناك غير !! لما تطلع قبل الفطور بعشر دقايق تشوف العموم مايكل شوماخر الكل طاير وحدني واحدك وكل واحد ماسك بيده صحن شوربه لا ينكت مع التبتون P:

ماكو دوام وماكو كليه المفروض الواحد يسنع جدوله ويستغل الشهر عدل ، الله يعين ان شالله

كل عام وانتوا بخير ياجماعه الربع ;)

at Saturday, August 22, 2009

M.O.C

وزاره المواصلات يا وزاره المواصلات ، اليوم قصتي قصه معاهم :)

الوالد الله يحفظه مواطن كويتي صالح يدفع فواتيره اول بأول ، امس قاري بالجريده ان وزاره المواصلات راح تبدى تدز انذارات وتقص الخطوط ابتداءا من نهايه الشهر ، خو ابوي طبيعي يدفع الحين قالوا انذارات ومادري شنو ويقوم الوالد الله يحفظه ويكلم ابنه المصون انا علشان اروح ادفع الي على خط البيت ، مادري منو يستخدمه بس ألزم ماعلى الواحد يأمن عياله والنت شغال XD

رحت اليوم الصبح حق اقرب مقسم حق الوزاره بالمنطقه الي يمنا ، يوم نزلت ولا ماكو إلا موظف وموظفه كل واحد ماسك تلفونه ويطالعني قلت لهم بدفع قالولي السستم عطلان روح المقسم الثاني ودلوني وين مكانهم ، رحت المنطقه الثانيه ولقيت الحبيب مسكر الشارع مادري شنو قصه امه :/


المهم دشيت ولا كله بنات وكلش ماكانوا يحشون ابوحده قاعده بروحها لووول قلت لها ابي ادفع فواتير البيت جان تقولي السستم داون صارله 4 ايام تبي جرب باجر ، لوووول انا قلت لها شنو امسح واربح ؟ وبعدين طول الاسبوع داون وتشغلونه الخميس والله ماظنتي XD
جان تعطيني رقمهم تقول دق قبل لا اتيي


لووول انا ضحكت على الاوراق قلت لها : this is so going to my blog
جان تقولي : شنو بلوقك ؟ انا خو عيار ما تمشي علي هالأسئله قلت لها دوري عنه XD

يا موظفه مقسم المواصلات اذا قاعده تقرين هالجمله يعني هذا بلوقي لوووول


اليوم كان عندي وايد مشاوير ، وحده من هالمشاوير رحت شريت حق ابوي آيبود شفل لووول مادري شلون راح يستفيد منه خصوصا انه مايسمع اغاني بس انا سويت الي علي XD

at Thursday, August 20, 2009

عظم الله اجركم

عظم الله اجرج ياكويت بعيالج

عظم الله اجركم باهلكم واخوانكم

عظم الله اجركم باهل ديرتكم

الي صار كبير وموشوي ، لما الحين انا منصدم من حجم المصيبه الي صارت ، 44 حاله وفاه و 76 اصابات اغلبهم حالات حرجه كلهم حريم ويهال !!!

ماعور قلبي كثر واحد شفته امس قاعد يدور امه ومرته واخته لقاها بالمستشفى ، ياجماعه تدرون يعني شنو امه واخته ومرته مفقودين بيوم واحد مايدري منو ميت ومنو حي !!! لا حول ولا قوه إلا بالله والله شي يعور القلب

قواكم الله الي رحتوا تبرعتوا بالدم ، وصلني خبر اكثر من 1100 شخص راح يتبرع والمستوصفات متروسه يقولون لنا تعالوا باجر ماكو مكان ، هذول اهل الكويت اختلط الدم السني والشيعي بالحضري والبدوي سبحان الله مانتيمع على قلب واحد إلا بوقت المصايب :(

بنك الدم مفتوح من 7 الصبح لما 9 بالليل والمستوصفات شغاله لا تبخلون على اهلكم

عظم الله اجركم مره ثانيه , العيون تبكي (العيون) !!

at Monday, August 17, 2009

fa3toooh.com

its official now , a new blog just joined the blogsphare

we just publish it n by "we" i mean me n Ducati

imagine the mount of HaBaL we will post XD

www.Fa3ToooH.com

hope u will enjoy our posts in the near future

till then , u r welcome to check it out ;)

at Sunday, August 16, 2009

BB users

مرحبا الساع ياجماعه الخير ، شخبار البلاك بيري معاكم ؟ D:

انا واحد مرتاح ومتأقلم مع الوضع الجهاز ممتاز ماشالله عليه وفيه كل الي ابي تقريبا ، الي خلاني اكتب الموضوع سالفه قالها واحد من الشباب ذاك اليوم ، كان يسولف عن البلاك بيري والنكت الي دايره فيه والبي بي ام ومادري شنو وشوي حولنا الموضوع عن الجات وانت تسوق ، عقب ماطلعنا اكتشفت ان الجات وانت تسوق انتحار اشكره اغبره D:

ياعالم يرحم والديكم لاتسوقون وتكتبون ، تري صج خطر انا امس قاعد اتحجى بالتلفون ومشغل البلوتوث بالسياره يعني كشخه لوووول اي خو ميزه موجوده ليش مااستخدمها ، المهم انا اسولف بالتلفون وفاتح تويتر قاعد اكتب وشوي ويكلمني واحد من الشباب على المسنجر طبعا هذا كله وانا اسوق على خط الغزالي طالع من الكليه /:
يوم سكرت التلفون استوعبت الينون الي كنت قاعد اسويه ، اي لحد يسأل شلون كنت تسوق لأني كنت امثبت السكان بركبتي وقاعد اكتب بايدي الثنتين لا والحبيب قياده قاعد ابتون بركبتي D:
انا الحمدلله ضامن نفسي وعارف متى اوقف ومتي اسوق بس يمكن العموم مونفسي لووووول شفيييه الكبير P:

لذلك وتضامنا مع حمله الداخليه بتغير ارقام الطوارئ من 777 لي 112 ومن هذا المنبر القصير الي طولي اناشد العموم انه يلزق الصوره الي فوق - الي سويتها بعشر دقايق وانا قاعد بالقهوه - على سيارته علشان الناس العاقله توخر عنه لأن الي قاعدين يسوونه مستخدمي البلاك بيري مو شوي P:

إلا على طاري اللون الاصفر شرايكم بالكفر مالي P:


اي ترى ماعندي سالفه هذا كل البوست لا تدور على شي زود اليوم P:

Drive safe ppl !!

at Monday, August 10, 2009

b7r ya b7r

ليله اليمعه طلعنا بحر , شوي وضحك ووناسه

يعطيه العافيه ديكاتي كتب الموضوع وحط الصور مالي خلق اضبطهم P:

لايطوفك الموضوع , ارعص اهني P:

at Sunday, August 09, 2009

Me & theft auto

حق الي مايدري انا عندي تاريخ عامر مع بوق سيايير البيت من انا صغير ، لووووول ايي يطلع مني لا تستغربون والي خلاني اكتب الموضوع امس وانا راد البيت خليت اخوي يسوق فينا لي نص الدرب بعدين انا توليت القياده والجماعه بتويتر شقوني شق قلت احط الفضايح اهني وان شالله محد من بيتنا راح يقرى XD

بدى الموضوع لما كنت عنطوطو بعمر الزهور 16 ، كنت متعود على السكان وكان عندي واحد من الشباب الله يذكره بالخير معطيني الخيط والمخيط متى ما ابي اسوق دقيت عليه وخذيت السياره D: , من حزتها وانا ايدي تحكني والوالد الله يحفظه كان يمنع منعا باتا اي نوع من هالنشاطات مشان هيك كان لازم اشغل ذكائي وحنكتي XD

البدايه كانت اني ادبر سبير حق السياره الي ابي ابوقها ، حزت صلاه العصر ابوي بالمسيد وامي تصلي دشيت غرفتهم وانا كلش مو عبثي ماادري وين كل برغي موجود بالبيت لووول طلعت السبير وخذيته XD طلعت مع صاحبي وماقلت له ليش ابيه ورحت الجمعيه صبيت لي نسخه ورجعت السبير مكانه علشان اضبط الوضع D:

بالليل ولما تأكدت ان العموم نايم نزلت وخذيت السياره ، طبعا الخوف ماله والي كونها اول مره بس بعد 5 دقايق خذيت على الوضع وماكنت اطلع بره المنطقه علشان تفاتيش تالي الليل ، آخذلي نص ساعه او اكثر احوس يمين يسار وبعدين ارجع السياره مكانها بالضبط لي شوي يمين ولا شوي يسار وحتى البانزين لو ناقص شوي اروح اعبيها نص دينار وارده مثل ماكان بالضبط XD

بعد مده احلوت السالفه وماقامت تعجبني السياره ابي شي اكشخ ، حطيت العين على الباسات مالت امي كانت يديده حزتها وتمت العمليه بنفس السريه ابوق السبير بس هذا ماقدرت اصب عليه فكان معاي ولما اخلص ارده ثاني يوم ، بعد فتره مليت من طلعه الليل ماكو قز لوووول والله مااستحي هم بايق السياره وهم يدور قز ، اهني وصلت حق مرحله ثانيه بالبوق انا اقولكم شلون ...

امي كانت تاخذني من الثنويه ولما نرجع تحط عفشها على الطاوله ونقعد نتغدى ، انا اخلص الغدى مبجر وانا صاعد اسحب المفتاح جني ماادري وانطرها تنام ، من زود الذكاء انطر الوضع يهدى عدل وانطر ابوي يرجع واتأكد العموم نايم ومقيل اهني اتل السياره لووول عاد قز الظهر غير في اوادم اتشيحط عليها واروح الجمعيه مادري ليش بس يعني شوفوني ولما انزل المفتاح مايطيح من ايدي يعني الي مايدري يدري الحين P:

في ذيج السنه الكبيسه سويت حادث محترم وانا ماعندي ليسن وكسرت سياره امي عدل وقعدت مده ماشميت ريحه المفتاح وبعدها يه الفرج ، اخوي شرى سياره والسياره الي كان يسوقها صارت سبيل حق الحراميه مثلي XD المشكله الحين ان الحبيب صارت عنده طلعات يروح يتعشى ومادري وين يقز تالي الليل ، ذاك اليوم انا قاعد افتر ولا الحبيب داش بويهي على الدوار اووبسسس توهق البطل جان اطير البيت بسرعه واصفط السياره وادش غرفتي وطيران بفراشي ، ماكو 3 دقايق ولا الاخ داش الغرفه وانا اشخر لوووول يعني مو انا D:
بيني وبينكم اتوقع ما مشت عليه بس عداها من كيفه الله يسلمه XD

بالمختصر المفيد ، مابقى سياره بالبيت مابقتها لوووول قمت اتمادى افر الكويت كلها بس المهم ارد السياره قبل لا يقعد ابوي ويكون البانزين مثل ماكان XD

لما اهني كافي فضايح وترى ماخفي كان اعظم بس خلوها مستوره ، حق الشباب الصغار انتوا مو قد حركاتي لا تفكرون تسوونها مالي خلق مشاكل P:

at Thursday, August 06, 2009

my Grandma

مشتهي اكتب اليوم ، الي ماله خلق لا يقرا D:

يدتي وماتدرون شنو يعني يدتي ، من انا عنونو - يعني الحين طويل لووول - وانا متعلق فيها بشكل مو طبيعي ، اهي امي الثانيه وبيتها اهو بيتي الثاني ، انقذتني من وايد طراقات كانت راح تحوشني من ابوي الله يحفظه و ياما خذيت وخذيت منها ولي اليوم آخذ وعمرها ماطلبت شي D:

العموم يسأل معاذ شنو هالحب الي نزل عليك مره وحده وانا اقولكم ليش ، الموضوع مو يديد بس اليوم صار موقف من مليون موقف يصير معاها فصلت من الضحك وقلت لازم اكتب عنه وعن جم واحد فيهم بالمره D:

السالفه ومافيها ياجماعه الخير انا اقعد عند يدتي اكثر من قعدتي بالبيت خصوصا ان بيتها على درب ردتي من اي مشوار يعني انا منشار صاعد واكل ونازل واكل D: , توني كنت خالص من محاضرتي ومحتار وين اروح ومثل ماتقول الله يحفظها : اليوع كافر ماله حوافر لوووول قلت خل اروح اشوف شنو عندهم ريوق خو انا ارفس الباب وادش ماكو مشاكل P: يوم وصلت ولا قاعده مع بنات عمي الصغار نايمين عندها وقاعده تريقهم وصاروا بقدره قادر من 3 يهال لما 4 الي اهو انا XD ضبطتني بذاك الريوق والصمون شغل ايدها وانا علاف واتحرش بالبنات واهي زف فيني كمل ريوقك يا صبي P:

واحنا قاعدين جان تقولي وينك امس ادق عليك ماترد ، الله يحفظها فيها طبع تخاف علي وكل ماشافت سياره نفس لون وحده من سياييري دقت على طول تتطمن انا وين وشنو قاعد اسوي ، قلت لها كنت نايم جان تقول انزين انا دفتر سيارتي منتهي ولما رحت اجدد قالولي عليج مخالفه سرعه مقفوله وين اسويها ؟ قلت لها خلاص عطيني اوراقج وانا اسويها لج بعد الريوق اضحكت وقالت خلاص بس اهو وين مكانهم قلت لها مرور العاصمه بالمكان الفلاني قالت خلاص غسل ويلا نروح ، يوم خلصت وشلت عدتي ولا الحجيه لابسه وسابقتني على الباب هووب هووب وين على الله جان تقولي انا بروح بروحي بس كنت بعرف المكان وانت وراك محاضره D: غيري بدلي ماكو فايده طلعت وخلتني لوووول عليها حركات هاليده D:

كورس من الكورسات كنت كل يوم اتغدى هناك مادري بيتنا شنو طابخين لوووول شوف الدلع عاد الصبح تدق علي معاذي شنو تبي غدا احنا راح نسوي جذي وجذي وانا اقول لها معاكم الخير موجود ، ولارجعت الظهر القاها نايمه والخدامه مضبطه الشغل من الشوربه لما اللبن وبعدها غرفتي موجوده اقط راسي وانام لما المغرب P:

قبل 6 سنين او اكثر وكان حزتها عيد ، انا كاشخ بالغتره ماكنت اعرف البسها تقول بنغالي يصب قهوه بالعروس ومرتز ناطر النوط كالعاده واهي يايتني تضحك انا قلت حلو يعني زايده الجيله هالسنه وماشوف إلا مفتاح البيت انا حدي تحطمت جان تقولي هذا علشان لا رديت من المدرسه وانا طالعه تدش على راحتك وتتغدى يوم شافتني متحبط جان اتييب الجنطه وتعطيني المقسوم D: لي يومكم المفتاح معاي ومسوي شغل بالليل وانا راد البيت اسير على الثلاجه واقفل الباب وراي وارجع البيت XD

ايام القحط والنشفان بينا كود لوووول اذا نزلت البوك معاي يعني فاضي وابي refill اهي قبل لا امشي تاخذ البوك تترسه وترده لوووول والله مااستحي P:

انا السبيد دايل رقم 6 , حاضرين اضبطكم واحد من ال VIP :P

مو زين تشوفون القعده لما اتيي رفيجه عمرها ام ناصر ، ماشالله عليهم ربع من قبل النفط ولي اليوم يتناجرون كاااااك واضحك على الضغاط انا اسكت اخاف يحوشني طشار خو طنازه عيايز قشره انا مو قدها P:

لي مواقف سابقه مع ام ناصر كتبت واحد منها من قبل

جني قرقت وايد هالبوست بس خلاص اعطيكم نفس لا تزهقون P:

at Tuesday, August 04, 2009