would you ?

100 بوست ماقريتهم بالثلاث ايام الاخيره الي كنت مريض فيها ، طبعا كان في جم بوست كنت اقراهم على الطاير والحمدلله بظرف ساعتين قريت حق الكل وان شالله مانسيت احد ، قبل كل شي الحمدلله الوعكه الصحيه انتهت وانا بخير وصحه وسلامه ولكم مني شكر كبير ماتوفيه الكلمات لكم من سأل عني بالبوست الي طاف او دق علي شخصيا وتطمن على حالي .. ألف شكر لكم احرجتوني

بالفتره الاخيره وخصوصا من العشر الأواخر حاشتني حاله مادري شنو اسميها والي اهي فقدان الرغبه بالكتابة ، ماكان الموضوع نقص بالماده الي ابي اتكلم عنها بالعكس عندي سوالف وصور مالها اول ولا تالي وكنت امشي واصور بس لما اقعد على الجهاز يحوشني إحباط وثقل موطبيعي بالكتابة :(

يمكن هالجم اليوم الي طحت فيهم مريض كانت علاجي والي خلتني ارجع اكتب مره ثانية ، وايد احادث صارت ووايد سوالف وحاليا الموضه اليديده بداية الدراسه والقعده من الصبح والزحمه وإلخ إلخ إلخ ، بصراحه ماراح اكتب عن هالموضوع لأن الكل معايش الحدث والتجارب تشهد :)

ودي بعد قطعتي ارجع بموضوع مثير للجدل واكلم الجانب الشرير بكل واحد فيكم نياهاهاها - معاذ انت كنت مريض ولا ماخذ دروس خصوصية عند ابليس - لوووووول الموضوع ياجماعه الخير والي ابي اعرف شنو راح تسوون فيه راح يكون كالتالي :

كل واحد فينا عنده حياتة الاجتماعية وجمعاته مع عايلته وربعه والدوانية والقهوه والجامعه لما آخر اللسته ، طبعا اغلب القعدات تصير فيها مواقف وقطات تتناسب مع جو القعده ولاخلصت القعده ورجعت بيتكم تقعد تفكر انت شنو قلت وفضحت عمرك ولا تطنزت على واحد كنت مستحي منه من قبل ولا شي لوووووول اي ادري كل واحد فيكم الحين قاعد يفكر بآخر مره قعد شنو سوى :)

السؤال يقول تررررررررررم : بالقعده اليايه مع نفس/بعض الاشخاص الي كانوا موجودين هل راح تحرجه وتقول السالفه/الموقف/البدلية الي كانت بذيج القعده وماقالها إلا علشان جو القعده الي كنتوا فيها ؟

مثال للتوضيح ، وبالمثال يتضح المقال لوووووول عادي كلية وعفسه لازم اصير متحدث :p

اخوك توه متزوج وقاعد يكشخ جدام مرته على حسابك ، تبط الجربه وتفشله طول عمره بمواقف ماتنقال ولا تسكت عنه ؟ :)

مثال ثاني ، طالعين مطعم بسياره وحده والي كان يسوق تأخر ولما دش المطعم شاف شباب يشبهونكم من ظهورهم قام كفخ واحد على راسه وقعد وبعدين اكتشف ان هذول مو ربعه وانتوا كنتوا تطالعون من بعيد وكل واحد ماسك بطنه من الضحك ، لما تتلاقون مره ثانيه راح تهزئونه بهالسالفه ؟

مثال ثالث ، بالدوانية انت وربعك وكل اسبوع تتضاغط انت مع واحد وتصير فصله على ضغاطكم ، وفي مره من المرات اشتدت السالفه وانت توهقت وودك تقلب الموضوع على صاحبك مع العلم انك ماسك عليه صوره لو توريها حق الشباب راح يحرم يدش الدوانية مره ثانية ، ماذا تعمل ؟ نياهاهاهاها

لووووووول فيني طاقه ومجموعه افكار شيطانية ودي اسويها بجم واحد ، مادري احترم نفسي واعدي الموضوع ولا اقلب الطاوله عليه واخليه مايحط عينه بعيني ؟ :p

at Wednesday, October 08, 2008