مابي اشوف اي لابتوب

تعبت ومليت وزهقت ولاعت جبدي وطفرت وطلعت شياطين اهلي من اللابتوبات اليوم ،مرات اكره نفسي لأن عندي خبره بالكمبيوترات ، كل واحد عنده كمبيوتر بالعايله ولا من ربعك يدق عليك حتى لو كان الموضوع واير الشحن موراكب عدل :/

اليوم جابلت 6 لابتوبات و2 ديسكتوب وحاليا قاعد اشتغل على لابتوب ابوي ماخلصت منه ، هذي اليوم العصر واكو وراي لابتوبين بعد قاعد اشتغل فيهم

اوكي الحمدلله انا عندي خبره كبيره بالكمبيوتر واغلب المشاكل الي تصير لهم اكون عارف حلها من اول مايفتح حلجه بس لي متى اسلوب الضغط جني مجبور اسوي لكم شغلكم ؟؟ على عيني وراسي اهلي وربعي واخواني بس ياجماعه الخير الواحد يقدّر ، اكو ناس والله تخدمه وتخلص له شغله وانت تضحك وفوقها بوسه لأنه يستاهل وعارفك ومقدر وضعك وظروفك واكو ناس تبي تفتك منه علشان حنته وشرهته الي مالها داعي ، إذا انتوا فاضين ترى انا وراي مليون شغله وشغله وتصدقون عاد ان كل يومي يطير على مشاوير مو حقي :/

فوق كل هذا وذاك تلقى الي مايفهم يفتي فوق راسك وليش ماتسوي جذي ولا جان شلت هذا وحطيت الثاني ، دامك تشوف نفسك فاهم وعارف روح خلص شغلك بنفسك لا تلوع جبد اهلي وياك @@

سوري بوست اليوم يلوع الجبد بس حدي تعبان وطفران لأن هذي قعدتي من الصبح وماكليت شي وعيوني طاحوا بالارض وانا اضبط بهالكمبيوترات وباجر دوامي من ال8 لما 2 والمحاضرات ورا بعض

سؤال يطرح نفسه ليش الناس ماتقدرك لما تكون مشغول مع انه في يوم من الايام انت كنت مخلص شغله وتعبت علشانه واهو يدري انت شكثر تعذرت من اهلك وربعك بس علشان شغله ؟؟ اكو ناس تتشره واحيانا يكون معاها حق بس مو جذي !!

at Monday, October 13, 2008